Makamishina wapya wa IEBC wakabiliwa na mtihani wa kwanza afisini

Na Emmanuel Oyasi,
Makamishina wapya wa tume huru ya uchaguzi na mipaka nchini IEBC wanakabiliwa alhamisi Desemba 27 na mtihani wao wa kwanza katika kusimamia shughuli ya uchaguzi nchini tangu walipoingia afisini.

Hii ni baada ya kustaafu baadhi ya makamishina wa awali wa tume hiyo na wengine kujiuzulu kufuatia utata ulioshuhudiwa katika uchaguzi mkuu wa mwaka 2022 ulioshuhudia William Ruto akitangazwa rais.

Uwezo wa makamishina hao sasa utapimwa kupitia chaguzi ndogo ambazo zinaandaliwa alhamisi katika maeneo mbali mbali nchini, makini yakielelekezwa hasa maeneo bunge ya Malava kaunti ya Kakamega ambapo vyama vya UDA na DAP-K vinakabana koo, na Mbeere kaskazini ambapo ubabe upo kati ya UDA na DCP.

Miito imetolewa kwa makamishina wapya wa tume hiyo kuhakikisha kwamba chaguzi hizo zinafanyika kwa njia huru, wazi na haki.
Wadau mbali mbali wakiwemo viongozi wa baraza la makanisa nchini NCCK wamesema ni kupitia jinsi changuzi hizo zitakavyoendeshwa ndipo wakenya watakuwa na imani na tume hiyo.

Wakiongea na wanahabari, viongozi hao chini ya naibu mwenyekiti wa NCCK eneo la kati ya nchi Stephen Njogu, aidha waliitaka IEBC kuwachukulia hatua wanasiasa wanaokiuka sheria za uchaguzi.

“Huu ni mtihani ambao IEBC inapasa kutuhakikishia kwamba tunaweza kuwategemea ili wakenya wawe na imani nao. Tuna waangalizi kutoka NCCK maeneo mbali mbali kufuatilia uchaguzi huu,” alisema Njogu.

Tayari visa kadhaa vya utovu wa usalama vimeripotiwa maeneo mbali mbali watu kadhaa wakijeruhiwa usiku wa kuamkia alhamisi baada ya watu wasiojulikana kuvamia hoteli ya mgombea wa kiti cha ubunge cha malava kupitia chama cha DAP K Seth Panyako katika eneo la kaburengu kaunti ya kakamega.

Inadaiwa genge hilo lililokuwa limejihami kwa silaha butu, ikiwemo bunduki lilivamia hoteli hiyo na kuwapiga waliokuwa ndani kabla ya kuharibu magari na mali ya thamani ya maelfu ya pesa.

“Hasara kubwa imesababishwa na wahuni kuvamia hoteli yangu. Kuna wanasiasa ambao walileta wahuni hao kutoka Kisumu ili kunivamia lakini nikapata habari za kijasusi kuhusu wahuni hawa, na ikanibidi nikimbilie usalama wangu,” alisema Panyako.

Tume ya uchaguzi IEBC tayari iliwahakikishia wapiga kura wa maeneo husika kwamba mikakati yote imewekwa kuhakikisha chaguzi hizi zinaandaliwa kwa mujibu wa sheria, na zinazingatia uwazi, ikiwaondolea wasiwasi wa visa vya wizi wa kura kushuhudiwa.