Kanisa la ACK Pokot magharibi latafuta suluhu kwa migogoro ya uongozi

Na Benson Aswani,
Kanisa la ACK dayosisi ya Kapenguria kaunti ya Pokot magharibi linaendeleza mikakati ya kusuluhisha mizozo ambayo imekuwa ikishuhudiwa katika kanisa hilo kwa muda sasa hali ambayo imepelekea kuchipuka makundi pinzani.

Kulingana na askofu mkuu wa dayosisi hiyo Simon Onyango, kanisa hilo liliamua kubadili mbinu ya kusuluhisha mzozo huo baada ya juhudi za awali kufeli, ambaopo makundi pinzani katika kanisa hilo yamedinda kuonyesha nia ya kusuluhisha mizozo hiyo.

“Nimejaribu kukutana na wachungaji wa kanisa hili tutafute suluhu kwa mizozo ambayo imekuwa ikishuhudiwa laikini wamekataa. Na kila hatua ambayo tunafanya kutafuta suluhu wanaelekea mahakamani. Wengine wamekuwa wakisema watasumbua kanisa hadi askofu mkuu astaafu,” alisema Onyango.

Onyango alisema kwa sasa mikakati inaendelea ya kuwachagua viongozi wapya wa dayosisi hiyo, agizo alilosema lilitoka kwa askofu mkuu wa kanisa hilo hapa nchini Jackson Ole Sapit.

“Tumeamriwa na askofu mkuu kwamba sasa tufanye uchaguzi, ambapo wachungaji wote wa dayosisi ambao wanahitimu kuwa askofu watatuma maombi ambapo watafanyiwa mahojiano na kisha kuandaliwa uchaguzi ili kumpata askofu mmoja ambaye atajaza nafasi hii,” alisema.

Baadhi ya viongozi waliokuwa kanisani humo wakiongozwa na aliyekuwa gavana wa kaunt ya Pokot magharibi John Lonyangapuo walipongeza hatua ambazo zinachukuliwa kusuluhisha mizozo hiyo hatua ambazo walisema zitasaidia kuwahakikishia waumini mazingira salama ya kuendeleza ibaada.

“Tunafurahi mwelekeo ambao umechukuliwa na kanisa hili kusuluhisha mizozo ambayo imekuwepo. Tofauti lazima zitaibuka mahali popote, lakini jambo la muhimu ni kutafuta suluhu kwa ajili ya changamoto hizo,” alisema Lonyangapuo.